“砌机时代”虽然落幕,但砌机嘅观念一直冇变


[IT搜购网 原创] 2018-12-27 10:32:27 编辑:
  白话广州

  新闻话,太平洋电脑城月底结业,有新嘅物业公司接手,明年就要改名。

  听到呢个消息,好多人都会有啲唏嘘。“喂,周末去太平洋装部机咯!”大家可能都唔会忘记,自己嘅第一台电脑系电脑城“砌”番嚟嘎。点解要讲“砌”?因为最开始嗰时,品牌电脑一般都好贵。

  组装机平又靓选择多多,自己拣配件嚟装,既可以睇住嗰荷包嚟消费,又可以满足自己嘅需求,好似砌嘢咁,一旧一旧咁执嚟嵌起身。

  2000年前后好流行DIY。好多70后、80后,大学时代都喺电脑城度过。中意打机嘅,就成日捻住点去升级部机,斋系买条内存或者显卡都可以睇成日。有啲装机经验嘅人就特别受欢迎,仲可以藉住装机呢个机会陪女仔行电脑城。

  嗰时行电脑城,人手攞住一张装机清单,写住芯片、主板、内存、显卡呢啲配件嘅型号价钱,逐间店去问询。嗰时啲电脑铺头真系多到离晒谱,入到电脑城好似明星咁受欢迎,不停俾人撩。行电脑城, 仲有一个乐趣就系去比价,买到最抵嘅配件装机先至系“高手”。仲记得,2001年一台主流配置嘅IBM台式机要差唔多成万蚊,同样配置嘅组装机可以悭两三千,识比价嘅仲可以悭三五百。

  “砌机时代”虽然落幕,但砌机嘅观念一直冇变,同玩音响玩手机一样,玩咩都可以“发烧”。◎阮栩 编辑

分享到:

频道精选

IT搜购网简介 | 广告服务 | 招聘 | IT搜购记事 | 站点地图 | 联系方式 | RSS订阅 | 猴科技
Copyright ©2005 - 2016 ITSOGO. All rights reserved. IT搜购网 版权所有. 冀ICP备13010806号